伦币 元
积分2686
主题
回帖0
精华
阅读权限30
|
評港歌手態度欠佳譚詠麟：未紅學乜人擺款！
頭條日報
好多人都唔知道，縱橫歌壇 34 年的譚詠麟是我中學同學，彼此相識超過 30 年，是難得的交心好友、好酒腳，我很佩服他的處世態度和作風，今次我特意以「Macallan 25」來招待這位樂壇校長，趁機與他促膝詳談現時樂壇的喜與悲，同時亦要他親自剖析剛推出的國語專輯《最愛笑的人》。
作為萬人景仰的巨星，應抱持謙虛、誠懇的處世態度，就以叱咤樂壇 34 年的譚詠麟為例，多年來總是以德服人，不像現時樂壇新人般不可一世。
「娛樂圈一定有大細超，未紅學咩人擺款？依家有好多新人，以為有幾個 Fans 就代表『紅』，嘿！我覺得大家應該要向 Diana Ross 學習，人哋真係國際巨星，但就親民有禮、毫無架子，我見世面都算多，但真係唔及佢，佢待人處世嘅態度真係好好，令人好舒服，早排我哋同台演出(為澳門賭場作開幕嘉賓)，我見佢化妝整頭全部自己搞掂，身邊只須兩個助手跟身，一落機即刻到會場 Rehersal(綵排)，態度誠懇又專業，佢知我係佢 Fans，仲特登叩我房門搵我影相留念，嗰刻好感動，之後大家喺台上合唱咗佢首《Endless Love》。」
睇好陳冠希
資歷深厚的譚詠麟，早已奠定其樂壇「校長」的地位，這位愛跟後輩分享經驗的譚校長，坦言睇好個性偏激、反叛的陳冠希，還逐一評論時下新人。
「其實近幾年我都有留意 Edison(陳冠希)，覺得佢對音樂好有誠意，從來冇放棄做自己嘅音樂，係未有人真正出手將佢帶入正軌、同未夠年份啫，佢成日記住我嗰陣幫樂仔(余文樂)唔幫佢，覺得我係話佢(教訓)，不過，我真係幾鍾意佢嘅音樂同信念，如果佢有時間可以搵我傾下偈，我有教無類㗎，當年四大天王都有搵我傾偈，我會將自己嘅經驗同佢分享；孫耀威、張敬軒都做得好好，新碟成績唔錯；浸咗一輪嘅鄭融，把聲開始入味；吳雨霏就好勤力，但欠缺舞台經驗，需要再努力；鄧穎芝都唔錯，唱得、把聲得，係可造之材。」
渴望做導演
曾幾何時，手執導演筒是譚詠麟的夢想，渴望拍攝的題材亦早已被別人搬上銀幕，雖然多年後的今天，那團導演火早已熄滅，但他仍憧憬拍攝一部能啟發人性思考的電影。
「導演其實係一份好艱巨嘅工作，好辛苦又乜都要做，做到隻狗咁，部戲出嚟好就話好啫，唔好？孭晒飛、冇人會可憐你，講真，要做導演，廿幾年前都做咗啦，你哋唔知咋，以前啲戲好多我都有份拍(做導演)，《花仔多情》就做得最多，不過，我最想拍一部人性化嘅電影，可以啟發人去思考，但電影成功都需要好多嘢去配合，好似《伊莎貝拉》都係多得金培達，依家做導演？你唔好搞我啦，畀我享受下人生仲好啦，我見陳可辛嘅理念同我好接近，所以呢啲辛苦嘢交畀佢啦。」
卸下面具做回自己
眾所周知，歌手、藝人的形象很重要，他們需要經過包裝、修飾，才能讓人有賞心悅目的感覺，但縱橫樂壇 34 年的譚詠麟卻堅持落台後，應卸下面具、尋回真我。
「我覺得歌手站在台上，應該要做好本份、全力以赴，但落台後，就要做返個人、做回自己，依家個個歌手都話有壓力，佢哋根本分唔清台上台下嘅分別，轉牛角尖好危險㗎，會抑鬱病，我明白歌手要維護形象，但佢哋只係活在『形象』陰影下，壓力係自己變出嚟，人生最大敵人就係自己，令自己最唔開心嘅人，都係自己，心態要識得調整先得，好似我咁，落咗台就咩都唔諗，拎住波鞋、篤臭豆腐，呢啲先係享受人生，佢哋由頭到尾都感受唔到。」
親自推介作品 part 1
《愛是唯一要求》
呢首歌好有滄桑感同民族 Feel，監製姜鋆係東北人，佢份人好硬朗，要求我用佢嘅唱法去演繹，一啲都唔可以改，直頭係任人擺佈，出到嚟感覺好 Raw，因為佢哋冇修飾過，你係要有個 Mood(心情)同 Experience(經驗)，先可以帶動到首歌。
《最愛笑的人》
呢首歌原先係屬於小柯老師(柯肇雷)㗎，佢知我要用歌，就畀咗自己最鍾意嘅歌我用，佢話首歌個 Image 同我好配合，我知道後當然好開心，不過如果佢第日想要返首歌，可以隨時攞返，兩份分都冇問題。
《夜晚的彩虹》
呢首歌係我突然靈感到作出嚟，話說當日我喺南京為演唱會綵排，其間我聽到 Richard Yim 喺度掃 Chord，我哼吓哼吓覺得幾好聽，於是用手機記低然後返酒店寫㗎，首歌啲音好密，唔夠氣真係唱唔到㗎，我記得嗰晚落好大雨，於是我幻想自己處身中國舊式平原，睇住啲雨一滴一滴、淅淅瀝瀝打入嚟，以第三身寫時下年輕人對愛情的感覺，「淅淅瀝瀝」好有詩意。
《翡翠情緣》
我知道好多歌迷都好鍾意呢首歌，佢哋話好似我以往嘅情歌路線，所以好穩陣，起初我諗住翡翠代表東方，水晶代表西方，如果首歌可以將呢兩種元素 mix 埋一齊，中西合璧就好，點知收到歌詞時，先知係一隻只有翡翠冇水晶嘅歌。
金錢獎項全是身外物阿倫：阿Sam應多做公益事業！
頭條日報
要知道，沒有一定地位的人，絕不能像「樂壇校長」譚詠麟這樣暢所欲言地發表己見，我很喜歡他這種無後顧之憂的感覺，在「Macallan 25」的魔力下，譚詠麟繼續把心底想說的事情逐一剖白，當中不乏他對好友的睇法和「歌神」許冠傑的不滿。
Paco：跟譚詠麟相處過的人，都知道他性格豪邁、為人豁達，縱橫樂壇 34 年的他，笑言一生最大成就，並非事業有成、家財千萬，而是身邊難能可貴的友情。
譚詠麟：「音樂以外，我一生最大成就係交朋友，你知嘛，之前有好多人都建議我去選特首，哈！我話唔好啩，因為我真係太有責任心喇，你要我做，我唔瞓都會同你做到最好，你俾我享受下人生啦，我哋呢行(娛樂圈)賺到嘅錢、榮譽同獎項都只係身邊嘢、過眼雲煙，帶唔走㗎，喺呢個圈識到人，而人哋又真係肯同你交心嘅，先係難得，所以如果要問我一生最大成就，我就一定話係交朋友。」
剖白對志偉、阿叻的睇法
Paco：認識譚詠麟的人，都知道他十分重視身邊好友，重視程度更媲美自己的家人，說到與他相交三十載的陳百祥(阿叻)和曾志偉，譚詠麟不禁有點感慨。
譚詠麟：「阿叻個人真係好好，當年佢破產都顧住班員工，問我借錢遣散班員工，不過佢嘅缺點就係太過黑白分明，一係黑、一係白，唔係朋友就係敵人，絕冇中間位，至於志偉就太多承諾喇，對朋友付出好多，成日都想做好多嘢，但人就只得一個，所以好多時眼高手低，承諾只係心諗㗎咋，不過我哋都要諒解佢，因為佢嘅承諾係出於好意，講真，做得朋友，就要忍受對方嘅缺點，呢個係我自己嘅宗旨。」
給肥姐多一點空間
Paco：譚詠麟跟沈殿霞(肥姐)感情要好，說到對方近年因抱恙在身而日漸消瘦，他亦不禁慨嘆起來，還語重心長地勸喻傳媒給她多一點空間。
譚詠麟：「其實大家真係要俾多啲空間肥姐，我哋喺《Loosers》(溫拿前身)時代已經相識，記得嗰陣我同阿叻成日上羅記(羅文)屋企打麻將，肥姐就會煮非洲雞俾我哋食，大家感情好好，肥姐亦係我好尊重嘅人，依家佢有病，大家應該俾多啲空間佢，我都知大家係關心，但咁做會造成好多不便，我好衷心希望傳媒可以俾多啲空間佢，等佢可以慢慢調理。」
大吐對歌神的不滿
Paco：不說不知道，「歌神」許冠傑(Sam)是阿倫的偶像，但當說到對方近年復出樂壇一事，他卻略有不滿地表示阿 Sam 應多投入公益事業、建設社會。
譚詠麟：「雖然話人各有志，我唔可以話人啱定唔啱，但好似阿 Sam 呢啲咁具影響力嘅人，點解唔喺『沙士』時期企出嚟？唔喺大家最需要佢嘅時候企出嚟？可能佢個人性格有問題，但點解唔可以撇開呢啲感覺，企出嚟鼓勵港人，同香港人同舟共濟？不過，雖係係咁，但到今時今日，佢都仲係我偶像。」
親自推介作品 part 2
《大買賣》
呢首係好有 Gimmick 嘅歌，路向亦比較少有，唔知陳可辛有冇聽過呢，啲歌詞好貼近《如果愛》部戲，假設《如果愛》拍續集，可以考慮下用呢首歌。
《男人總是要面對》
我好鍾意個音樂，啲詞由陳少琪負責，話男人要面對責任，講就好易，其實好重，做男人絕唔可以逃避，係必然嘅，要企出嚟面對，即係話你一出世，阿媽已經同你講第時要孭起頭家。
《一路到天涯》
呢首係香港第一主打歌，我自己好鍾意，因為加咗啲鼓聲落去，好有民族風格，而且製作過程好感動，記得有一晚我同監製譚伊哲話鍾意啲節奏明快、音樂強勁嘅快歌，一路講一路哼個 Melody，佢即晚做起隻歌俾我，搵崔恕填詞，感覺好似好似喺沙漠上面奔跑，監製仲將我段哼嗰段 Melody mix 落西藏祝福語度做背景和音，所以好特別。
《千年萬年》
呢首歌感覺好校園、好溫馨，自己以前真係未演繹過呢類作品，其實成張專輯，首首歌我都係用一個鐘頭便錄起晒，但呢首就比較特別，因為試過好多唔同版本唱腔去演繹，最終錄咗三個鐘頭，先至完成。
《全心全意》
呢首歌刻意編到最後，係好有意思的，希望啲人聽完前面啲咁激情音樂後，可以有啲嘢去緩和下，等人再㗳返轉頭時有另一啲感覺。
|
|
IP卡
狗仔卡
发表于 2007-9-11 11:47:51
提升卡
置顶卡
沉默卡
喧嚣卡
变色卡
显身卡
发表于 2007-9-14 00:52:07
衬衫不错~